قالت الفنانة دينا، فى ثانى حلقاتها من برنامج ع المسرح، عندى صراعات مع المجتمع لأن الأخير لديه حالة غريبة بينه وبين الرقاصة، يحبوها ويحضروها أفراحهم، لكن ممنوع تتزوج ابنهم، ولديهم حالة سلبية وعاجنين الدين بالفن فشايفينها حرام.
وأضافت دينا خلال استضافتها ببرنامج "ع المسرح" الذى تقدمه الإعلامية منى عبد الوهاب، و المذاع على قناة "الحياة": أن الصراع متواجد معى طوال الوقت، وانا شخصية غريبة عن الرقص، ولو كان وضعى الاجتماعى مختلف يمكن كنت أرى أن ده عادى".
تابعت دينا، "انا ست بيت عادية وانا اللى بطبخ، بعمل كل حاجة وحياتى طبيعية، وتركيبتى مختلفة عن باقى الفنانين، ونظرة المجتمع حالة مجتمعية من أيام تحية كاريوكا، وهتفضل موجودة طول الوقت، وصعب تغيير وجهة النظر.
وتحدث الفنانة دينا، عن قول أحد رجال الدين :"إن أموال الراقصة حرام" قائلة: " هو حر بيفتى فى حاجات كتير، وقال عليا "خنفة" وده معتبروش شيخ وهو بيعيب فى خلقة الخالق، وانا مش "خنفة".
وأضافت دينا : فى ناس بوشين بيتعاملوا معايا ومن ورايا يقولوا عليا كلام دول لازم يتشالوا من حياتك وكأنهم معدوش، ناس عاوزين يمشوا حالهم طالما فى منفعة ليهم".
تابعت دينا، انا بتكلم من قلبى، وبعد الولادة بـ 40 يوما نزلت أرقص وكنت محتاجة ألم جسمى فلبست شورت فعجبت الرقابة، وقلت من منظور الدين إن أى "عرى" حرام، والوصول لمرحلة السلام النفسى يأتى بعد مشوار طويلة من كلام المجتمع والتخبط، وانا عندى دايرتى المقفولة عليا".
كما تحدثت عن الخوف من الله قائلة: "كل الناس عندها خوف من ربنا وبتغلط وعندها التقوى والإيمان وبيغلطوا، ومن ضمن المصيبة أن الناس متخيلة إن الراقصة لا تخشى الله، أو حتى المغنى أو الممثلة".
وأضاف دينا : قلت "فالله خير حافظ وهو أرحم الراحمين" فبقيت تريند مش عارف ليه، وبقول الآيات المنجيات وآية الكرسى قبل ما أنزل من بيتنا".
تابعت، "عمرى ما حكمت على حد بحاجة، هما حرين يفكروا زى ما هما عاوزين وانا حرة أعمل اللى عاوزاه وفى الآخر مافيش بينا حاجة، ومحدش هيمنعنى أقول إيه ومش هيفرق معايا حاجة.
ولفتت إلى أن "سولاف فواخرجى قالت ربنا أكرم من أنه يكون عنده جنة ونار فرديت عليها :"دا تهريج لأن الجنة والنار مذكورين فى القرآن، والأخير لا يتغير ومينفعش نلعب فى معانى، ولا نخرج تصريح منافى للدين، والأفضل لا تتدخلى فى الدين، ومش عارفة متقوليش سيبى الأمر للمفتى".
وقالت دينا، "مافيش مجتمع خالى من الأمراض النفسية لأن مش كل حاجة عاوزينها بيلاقوها أو كل حاجة بتتوفرلهم، وانا فضلت أعمل الحاجة اللى بحبها حاولت عمل فكر، ويمكن وصلت للناس ويمكن بحاول أوصل".
وأضافت : كنت شايفها وانا صغيرة هغير العالم وعشت أكثر صراع فى الجامعة، والطلبة طبلولى وصفرولى وانا باستلم الكارنية فى الجامعة، وحسيت إن دمهم خفيف".
وأكدت دينا، انا شخص كاره للظلم ومبحبش أظلم حد، وليس لدي صراع مع الرجال وكان عندى حاجات كويسة فى الزواجات وتخطيت السلبيات، وطول عمرى بدور على الطيبة والأصل والحنية، والأمان مش مع الراجل، لأن الأمان بيكون مع الشخص نفسه والأمان بيجى من عند ربنا".
