كشف رجل الأعمال منصور عامر أسرار حياته الشخصية وطفولته ومواقفه خلال فترة دراسته، مشيرًا إلى أنه كان من الطلاب الأكثر التزامًا خلال الدراسة.
وقال منصور عامر، خلال حواره على تليفزيون اليوم السابع: "امي توفيت في عمر صغير. وكنت الدلوع بتاعها.. لإني كنت أصغر واحد في أخوتي.. أما والدي فقد تعلمت منه الكثير.. تعلمت منه اكبر دماغى.. الدماغ اللى تستوعب متصطدمش ولازم الانسان يكون عنده قدره يمتص اللى قدامه".
وتابع: "كان لدي ذكريات جميلة في كلية حقوق عين شمس، واستمتع بها كثيرًا واتذكر صحاب الجامعة من كل مرحلة، وما زالت صداقتي قائمة حتى الآن.. ولما اتعرف على حد مناسبة جديدة بعرفه على صحابي القدام عشان نكون شلة مع بعض.. الصاحب يعني الصداقة يعنى حد تأمن له وتعطيه سرك بخلاف المعرفة.. ولازم يكون شبهك".
وعن طفولته، قال: "الطفولة في الريف شيء رائع، الريف الحلو.. خصوصًا بتاع زمان.. ولسه بروح الريف لحد دلوقتى وأنا مدين للناس دي".
وأشار إلى أنه عمل بالقضاء ثم المحاماة ثم قرر أن يغير الطريق للعمل بالعقارات، موضحًا: "قررت أن اسلك طريق مختلف تمامًا وهو العمل بمجال العقارات، وكان يقولي يامجنون حد يسيب المكان ده.. وانت شاطر ومحبوب.. فقلت له محتاج حاجة ارتاح ليها نفسيًا وأكون سعيد.. نعم اشتغلت وكيل نيابة ثم محام ثم اشتغلت بالعقارات".
وواصل:"اشتريت بيت في مصر الجديدة بـ 250 ألف جنيه، وهدمته ثم قمت ببيعه، والناس كانت بتشترى مني على طول عشان كنت بعمل حاجات كويسة.. ولما شفت الخرسانة قلبي هفهف.. أنا بتاع خرسانة، وبحب الشغل ده، والإعمار بالنسبالي متعة وبكون مبسوط".
