بالفيديو والصور.. شقى عمرى يهون علشان مصر.. الحاجة سبيلة تزور "اليوم السابع" بعد تبرعها لصندوق تحيا مصر بـ200 ألف جنيه ومشغولات ذهبية.. وتؤكد: كله علشان عيون السيسى..وتوجه رسالة للنساء:مصر محتاجة ليكم

"أتبرعت بثروتى علشان عيون السيسى، بحبه أوى ونفسى أشوفه كل يوم وأقعد جنبه، مصدقتش نفسى لما قالولى هقابل حبيبى مش هنام لمدة يومين من الفرحة".. بتلك الكلمات بدأت الحاجة سبيلة على عجيزة 75 عامًا، حديثها لـ"اليوم السابع" بعد تبرعها بكامل ثروتها التى بلغت 200 ألف جنيه و4 أساور وخاتم ذهب.

وقالت الحاجة "سبيلة": "بقعد اتفرج على السيسى فى التليفزيون فى خطباته وأقوله اطلعلى نفسى أقعد معاك، وولادى يضحكوا عليا، لما دعونى علشان أتكرم قولتلهم نفسى أتبرع بكل حاجة بس أشوفه وأقعد مع حبيبى السيسى".

وكشفت "سبيلة" عن كواليس لقائها بالرئيس السيسى صباح اليوم الأربعاء، قائلة: "أول ما شوفته خدت إيده فى إيدى، كان قاعد بعيد عنى قولتله لا تعالى قرب جنبى هنا، وباس رأسى وقالى تطلبى أيه قولتله مش عايزة غير أنك تكون بخير وسلامة وربنا يحميك لمصر ولينا يا رب".

وأضافت المتبرعة بكل ثروتها لصندوق "تحيا مصر": "الرئيس السيسى قالى تطلبى أيه محتاجة إيه وأنا اعملهولك، قولتله مش عايزة حاجة كفاية أن شوفتك ولمستك بأيدى، ولو معايا أكتر من كده كنت أتبرعت بيه، ده السيسى عملنا كل حاجة عملنا كل الحلو، خلانا ننام فى أمان وسعادة ربنا يحميه لينا".

وعن شعور أبنائها بعد تبرعها بكامل ثروتها لصندوق "تحيا مصر"، قالت السيدة "سبيلة": "ولادى فرحوا أوى وعاملين فرح واحتفالات فى البلد، مش زعلانين ولو كنا عارفين أننا هنقابل الرئيس السيسى كنا بعنا أى حاجة واتبرعنا بيها تانى، والسنة اللى جاية هحوش واتبرع تانى".

وتابعت سبيلة إن الرئيس كان يتعامل معها وكأنه والدته، مضيفة: تحدث معى بمنتهى الود والحب، وسألنى جبت الفلوس منين، قولتله تحويشة عمرى وعلشان خاطر عينيك أتبرعت بيها، نفسى فلوسى تروح للجيش، أنا بحب القوات المسلحة أوى ونفسى كل حاجة تروح ليه، هما اللى حمينا ومخلينا ننام فى أمان".

ووجهت سبيلة رسالة لجميع النساء قائلة: "اتبرعوا بالى تقدروا عليه، مصر محتاجة ليكم ولازم نساعدها والسيسى هيقف معانا ولازم نساعده"، مؤكدة أن شعبية الرئيس السيسى ما زالت فى ارتفاع عكس الشائعات التى يرددها البعض، قائلة: "والله الناس بتحب السيسى أوى ولما أروح البلد هحكيلهم كلهم وهخليهم يتبرعوا لـ"تحيا مصر".

من جانبه قال محمد رسلان نجل الحاجة "سبيله"، أنهم سعداء بتبرع والدته لصندوق "تحيا مصر"، مؤكدًا أنهم لو تأكدوا من زيارة الرئيس اليوم لباعوا أملاكهم للتبرع بها لصالح مصر حبًا فى الرئيس السيسى، مشيرًا إلى أن هناك احتفالات كبيرة بمحافظة الدقهلية فرحًا بمقابلة الرئيس السيسى للحاجة "سبيلة".

وأضاف رسلان، أن الحاجة "سبيلة"، حلت أكثر من أزمة داخل بلدتها دون أن يعلم أحد فكانت تشترى السكر بأسعار مرتفعة وتبيعه للمواطنين بأسعار مخفضة، حبا فى مصر والرئيس السيسى.

واختتمت الحاجة "سبيلة" حديثها بتوجيه رسالة إلى رجال الأعمال قائلة: "اتبرعوا لمصر هى محتجاكوا، وأقفوا جنب السيسى، ولو موقفتوش الستات هى اللى هتقف وهنشيل مصر على أيدينا"، متمنية للرئيس السيسى السلامة والصحة والأمان".