يا ستار يا ميغيث خرجنا من دهاليز دنيا الرياضة بخير.. أو ارحمنا وخلصنا من خفافيش الظلام المعششين فى عالم الكورة الذين يتعاملون معها بطريقة مصاص الدماء!
خفافيش الظلام دولم.. والله لو تصادف وقابلهم الشيطان ذات نفسه لاستعاذ بالله.. وطبعا قلنا «تصادف» لأنه مش ناوى يقابلهم بمواعيد مسبقة فهم أجدر منه على إفساد أى مكان يتواجدون فيه!
ياعمنا أنت وهو بعضهم يزايد على أرواح الضحايا الأبرار، مدعيا الملائكية، مطالبا بالقصاص والتعويض، وهو فى نفس الوقت يعمل على خراب البلد وليل نهار ينهب ويسلب ويرتب لبيزنس هنا وهناك.. يعمل بأجر ويطالب من معه فى اللجنة بأن يعملوا متطوعين، ومعاه ابن، ربنا يحميه على البيزنس مربيه والكل بيقول ده لاعب لا غنى عنه، يعنى فساد منه فيه!!
واحد تانى عامل مدير فى الفريق الكبير، كل شغله إنه ينقل السر للبيه الخطير، ويحفظ كل كلام اللعيبه علشان اللى يتكلم يخلص عليه.. تاجر أراضى ومش فاضى بس نقول لمين ما هو ده زمن الصغيرين.. وحتى لو قلنا.. يكون الرد.. فوت بكره ياسيد؟!
واحد ثالث عامل لجنة، كل همه أن ابنه يسافر علشان «الشوبنج».. وكله بالقانون.. والقرارات الوزارية، حتى لو سألوا أبوه قال: الورق عندكم هاتوه!!
الرابع بقى يا أسيادنا بيقول إحنا أحسن مسوقين وعلى الخير للنادى ناويين.. نازل تأجير فى دكاكين وقبض بالشمال واليمين، ومن غير سبب اللى يكلمه يقوله: دى قلة أدب مزاد إيه.. ومناقصة مين إحنا بتوع بنوك وعارفين!!
أما الخامس يا أهل الخير.. فعضو مجلس إدارة عنده يجى 30 عمارة، فاكر أكل مال أهله شطارة، ويحاول دايما يختفى فى نضارة وناسى إن الحرام يكنس الحلال ويحرقه زى السيجارة!!
والعياذ بالله السادس عامل شيخ وهادى جدا.. وكل شىء عنده عادى جدا.. معاهم معاهم.. ومعاهم.. معاهم برضه إلا فى الخير فعليهم.. عليهم.. سلفى تلاقيه.. إخونجى شغال.. ثورجى فى الميدان، دبلوماسى فى الإعلام.. حتى التسعيرة بتاعة النجوم بيظبتها مع بتاع لوحه رجل من الفيوم.. بس مين تلوم إذا كان الريس بتاعهم كل اللى يهمه ملايين المعلوم.. اتصالاته كبيرة.. تشبه أجداده بناة الأهرام.. مش قلت لكم لو قابلهم الشيطان هايستعيذ بالله!
مشاركة
اضف تعليقاً واقرأ تعليقات القراء
مشاركة
اضف تعليقاً واقرأ تعليقات القراء
اضف تعليق
تم أضافة تعليقك سوف يظهر بعد المراجعة
عدد الردود 0
بواسطة:
المصرى
استنتاج